Rreth Vlerësimit për Sipërmarrjet e Qëndrueshme 

Vlerësimi për Sipërmarrjet e Qëndrueshme synon të evidentojë dhe vlerësojë sipërmarrjet që tregojnë një përkushtim të veçantë ndaj qëndrueshmërisë dhe kontribuojnë në arritjen e Objektivave të Zhvillimit të Qëndrueshëm të OKB-së (UN SDGs). 

Ky vlerësim njeh sipërmarrjet që po formësojnë të ardhmen e Shqipërisë, duke dëshmuar se qëndrueshmëria nuk është vetëm përgjegjësi, por edhe një nxitës i inovacionit, mundësive dhe rritjes. 

Jemi në kërkim të liderëve shqiptarë; sipërmarrjeve që nxisin ndryshime pozitive përmes veprimtarisë së tyre, produkteve, shërbimeve dhe praktikave të përgjithshme të biznesit.   

Fokusi për vitin 2026: Rritja e Gjelbër

Sipërmarrjet që zhvillojnë aktivitetin e tyre tregtar në çdo sektor – jo vetëm ato që zakonisht i quajmë “të gjelbra” – po përballen me një botë që po ndryshon vazhdimisht: presione të lidhura me klimën, burime gjithnjë e më të kufizuara, kërkesa tregu që evoluojnë dhe standarde të reja të qëndrueshmërisë. Për sipërmarrjet, përshtatja ndaj këtyre ndryshimeve nënkupton gjetjen e mënyrave më efikase për të operuar, inovuar, përdorur burimet dhe për t’iu përgjigjur sfidave të reja.   

Pikërisht, kjo është ideja e Rritjes së Gjelbër në kuadër të këtij Vlerësimi: të rritesh dhe të jesh i konkurrueshëm duke e pasur qëndrueshmërinë në themel të të bërit biznes – përdorimi efikas i burimeve, ulje e ndikimit mjedisor dhe ndërtim i një biznesi më të qëndrueshëm e më rezistent për të ardhmen. Nuk është e nevojshme të jeni një sipërmarrje që operon në fushën e mjedisit për të aplikuar – çka do të vlerësohet janë hapat konkretë që po ndërmerr sipërmarrja juaj dhe rezultatet e prekshme që po arrin. 

Vlerësimi përqendrohet në katër fusha: mënyrën se si sipërmarrja menaxhon energjinë dhe ndikimin në mjedis; si i përdor, redukton dhe ripërdor burimet; si mbështet punonjësit dhe komunitetin, si dhe përdorimin e inovacionit dhe qasjeve largpamëse për t’u bërë më konkurrues dhe më i qëndrueshëm. Sipërmarrjet mund të jenë më të avancuara në disa fusha, dhe mund ta dëshmojnë lidershipin e tyre në mënyra të ndryshme. 

Kategoritë e Vlerësimit

Në total do të jepen dhjetë vlerësime:    

• Vleresimet për Sipërmarrjet: Një fitues për secilën kategori: Sipërmarrje Mikro, e Vogël, e Mesme, e Madhe dhe Ndërkombëtare. 
• Kampionët sipas Tematikave: Pas ndarjes së vlerësimeve për sipërmarrjet në secilën kategori, të gjitha aplikimet do të shqyrtohen për të evidentuar katër arritje të jashtëzakonshme sipas tematikave:  
  • Kampioni i Klimës dhe Mjedisit 
  • Kampioni i Ekonomisë Qarkulluese 
  • Kampioni i Sipërmarrjes së Përgjegjshme dhe Njerëzve  
  • Kampioni i Inovacionit dhe Sipërmarrjes së Përgatitur për të Ardhmen 

Vlerësimi i Madh!

Ky vlerësim i jepet sipërmarrjes që arrin rezultatin më të lartë ndër të gjitha kategoritë dhe tematikat e vlerësimit.

Pikët do të pasqyrojnë nivelin e zhvillimit dhe ndikimin e praktikave të dëshmuara, duke marrë parasysh madhësinë, burimet dhe kontekstin në të cilin operon sipërmarrja. Vlerësuesit do të shqyrtojnë nëse sipërmarrja demonstron lidership në raport me atë që mund të pritet në mënyrë të arsyeshme nga një sipërmarrje me përmasa të krahasueshme. 

Pasi një sipërmarrje të jetë përzgjedhur fituese për një vlerësim, ajo nuk do të merret në konsideratë për një kategori tjetër. Në vend të saj do të përzgjidhet sipërmarrja e rradhës e pranueshme me rezultatin më të lartë. 

Pse duhet aplikuar për Vlerësimin e Sipërmarrjeve të Qëndrueshme? 

Duke u bashkuar me komunitetin tonë të sipërmarrjeve të qëndrueshme, sipërmarrja juaj do të jetë pjesë e një rrjeti në rritje të bizneseve të përkushtuara për të krijuar një ndikim afatgjatë, si social ashtu edhe mjedisor. Përpjekjet tuaja meritojnë të shihen, të promovohen dhe të shërbejnë si shembuj për ata që ende nuk janë njohur me Objektivat e Zhvillimit të Qëndrueshëm (SDGs). Së bashku, mund të ndërtojmë një komunitet biznesi më të qëndrueshëm dhe të përgjegjshëm në Shqipëri. 

Pse SDG- të janë të rëndësishme për biznesin?  

• Përputhin strategjinë e biznesit me prioritetet globale, duke siguruar qëndrueshmëri dhe rëndësi afatgjatë.  
• Komunikojnë ndikimin e qëndrueshmërisë në një mënyrë që kuptohet nga investitorët, partnerët dhe konsumatorët.  
• Bashkëpunojnë dhe inovojnë, duke ndërtuar partneritete që nxisin si fitimprurjen ashtu edhe ndryshimin pozitiv.  

Çfarë do të thotë ‘praktika të qëndrueshme biznesi’ për sipërmarrjen tuaj?

Afati për dorëzimin e pyetësorit është deri më 18 Tetor 2026